Святлана Ціханоўская звярнулася да беларусаў з нагоды 102-й гадавіны антыбальшавіцкага паўстання жыхароў Слуцкага павета. Нагадаем, яно адбылося 27 лістапада 1920 года, а яго ўдзельнікі выступалі за незалежнасць Беларусі пад бел-чырвона-белым сцягам. Тады паўстанцы працягвалі баявыя дзеянні да 31 снежня таго ж года.
— Сёння — дзень, які амаль не ўзгадваюць у падручніках гісторыі. Толькі 20−30 гадоў таму шырокаму колу беларусаў стала вядома пра Слуцкі збройны чын. Гэта важная частка нашай гісторыі. У 1920 годзе ў Слуцку ўзнялі паўстанне: беларусы хацелі абараніць сваё права жыць у Беларускай Народнай Рэспубліцы — у Беларусі, вольнай ад любой іншай улады, акрамя беларускай.
Гэта быў не «галодны бунт», якіх у тыя гады было шмат на аскепках Расійскай імперыі. Гэта быў рух, у якім і сяляне, і інтэлігенцыя абаранялі ідэю існавання Беларусі. Людзі, якія нават не былі прафесійнымі ваеннымі, змагаліся супраць значна большага войска. Яны не мелі шматгадовай падрыхтоўкі — але мелі годнасць і мэту жыць у сваёй вольнай краіне, а не быць часткай чужой імперыі, — заявіла Ціханоўская.
Ціханоўская таксама адзначыла, што праз сто гадоў «гісторыя паўтараецца».
— І мы мусім ведаць урокі гісторыі, каб не хадзіць па коле войнаў і крызісаў. Зараз прапаганда намагаецца схаваць гэтую дату. Бо Слуцкі збройны чын даказвае, што нашая нацыя самастойная, што беларусы могуць бараніць сваю незалежнасць. Калі вы, як калісьці я, не ведалі пра Дзень Герояў, пачытайце пра яго і распавядзіце сваім сябрам, — дадала Святлана Ціханоўская. — Бо гэта гісторыя пра тое, як нашыя суайчыннікі ўзялі на сябе адказнасць за тое, каб не быць ахвярамі — і быць сапраўднымі абаронцамі.
